Book 定位聖誕開大餐

Merry Christmas!

一年到晚如此多節日,有些是屬於特定人物,像父親節、母親節及兒童節等,有些似乎只適合靜靜的慶祝,像情人節。唯獨年尾的「重頭戲」聖誕節,無分國籍、大人細路人人有份,一於揀定餐廳 Book 定位,齊齊食大餐歡度!

慶祝聖誕,各適其適,最簡單開心莫過於食餐好。既有意大利餐廳糅合新舊元素、並以最優質食材款客;亦有西餐廳畀大家包場,想過二人世界,或者大班朋友開P都得!

新舊糅合 驚喜意菜

坊間的聖誕大餐以西式為主,但來到金域假日酒店的意大利餐廳 Osteria ,便可品嘗濃厚的意式風味,其意籍總廚 Michele Camolei 既精通意大利各地廚藝,亦愛加入新元素,為傳統意式佳餚引發驚喜:像以意大利葡萄汽酒(Prosecco)做醬汁、將意大利聖誕蛋糕(Panettone)變成慕絲甜點等。

既是意式盛宴,當然不乏當地食材,包括黑毛豬巴馬火腿、水牛芝士、Amedei朱古力,配以餐廳自製的墨汁寬條麵及自製香腸,風味正宗, Chef Michele 還以和牛、北海道蟹肉入饌,提升食味。他特別推介一道「和牛腿卷配牛肝菌粟米糊」,這不是每間意大利餐廳都供應的菜式,選用嫩滑的和牛腿肉入饌,捲在形似桌球桿的木棍上,大家不妨按照傳統,手執木棍大啖食!

特別餐單 開 P 最o岩

聖誕節未到,成班 Friend 已相約開P慶祝;怕 Home Party 準備工夫多,或可向餐廳打主意!西餐廳 Classified 就提供包場服務,以中環分店為例,店中的 VIP 房可容納 12 至 14 人,最低收費為 $5,000起,自成一國外,環境亦舒適愜意。

餐廳更特別為包場的食客,供應豐富的 8 道菜聖誕新年特餐,包括充滿聖誕氣氛的 Welcome Drink 、頭盤、湯、沙律、主菜等,還有香梨批、芝士拼盤及聖誕餡餅等作結,特別滿足。行政總廚 David 表示,為慶祝這大節日,菜式都比平日精緻、豐富,像有魚子醬、黑松露等,主菜更可選矜貴的野味雉雞,或是做法複雜的釀羊鞍,而且菜式分量較大,方便食客一同分享,感覺窩心。

5 道菜式意大利晚餐

供應期:12 月 24 及 25 日 (晚市)

每位 $788(另加一服務費)

查詢:2315 1010

聖誕新年特餐

供應期: 12 月 24、25、31 日及 1 月 1 日晚市

價錢:每位 $750(另加一服務費)

查詢:2147 3454